നിനവിൽ ഗൃഹാതുരത്വം നിറയ്ക്കുന്ന ഓർമ്മകളെ, അതിശയോക്തിയോടെ കേട്ടറിഞ്ഞ പുരാവൃത്ത ജീവിതങ്ങളെ, സങ്കൽപ്പിച്ചു കൂട്ടിയ കഥകളെ എല്ലാം പെറുക്കിക്കൂട്ടി അടുക്കിവെയ്ക്കുകയാണിവിടെ.

കഥകൾക്കും ഭ്രമങ്ങൾക്കും കൂട്ടുവരുവാൻ പാകത്തിൽ പലതും ചുറ്റുവട്ടത്ത് തന്നെയുണ്ടായിരുന്നു. അതിലൊന്നായിരുന്നു പാറമുകളിൽ തലയുയർത്തി നിന്നിരുന്ന പാലമരം. ഭയത്തെ ഗന്ധം ആവേശിച്ച ദിവസമാണ് ആദ്യമായി പാലയുടെ സാമീപ്യമറിഞ്ഞത്. പാലയുടെ ഉയരത്തിൽ നിന്നും അടർന്നു വീണുകൊണ്ടേയിരുന്ന പൂക്കളിൽ പറ്റിപ്പിടിച്ചിരുന്ന ചെറുതേനീച്ചകൾ മുടിയിലും കൈകളിലും ഇരമ്പിയാർത്ത് ഒട്ടിപ്പിടിച്ചു. അജ്ഞാതമായ ഉൾപ്രേരണയാൽ കൈ നിറയെ പൂക്കളെടുത്ത് മണപ്പിച്ച നിമിഷം ആ ഗന്ധത്തിൽ പെട്ടുപോയി.

മഴപോലെ പെയ്‌തിറങ്ങിയ മഞ്ഞിൽ കുളിച്ചു‌, പാലപ്പൂക്കളാൽ പൊതിയപ്പെട്ടു പുനർജ്ജനിച്ച നാളിലാണ് നാടിന്റെ കഥകൾ തേടിയെത്തിയത്.

കൊണ്ടും കൊടുത്തും ജീവിച്ചിരുന്ന ചട്ടമ്പിമാരുടെ വീരകഥകൾ.

അതിജീവനം എന്തെന്ന് കാട്ടിത്തന്ന പെണ്ണുങ്ങളുടെ അത്ഭുതപ്പെടുത്തുന്ന ജീവിതങ്ങൾ.

ലഹരിയുടെ ആസ്ഥാനമായി അധഃപതിച്ചുപോയ ജനതയുടെ കണ്ണുനീരിന്റെ പോരാട്ടത്തിന്റെ ചരിത്രങ്ങൾ.

വിശ്വാസവും ഐതീഹ്യവും കൂടിക്കുഴഞ്ഞ മാടൻതമ്പുരാന്റെ നടയിലെ ദ്രാവിഢപ്പെരുമയുള്ള ആചാരങ്ങൾ.

ഇവയെല്ലാം അടുക്കിപ്പെറുക്കി വെച്ചതാണ് ഈ പുസ്തകത്തിലെ കാഴ്ചകൾ.

ഭയന്നും, പ്രണയിച്ചും, മോഹിച്ചും, വിരഹിച്ചും നടന്ന വഴികളിൽ പാലപ്പൂക്കൾ കൊണ്ട് പരവതാനി വിരിയിച്ചു തന്ന നാടിനുള്ള ഉപഹാരമാണ് ഈ പുസ്തകം.